Болага қандай ўйин анжомлари мос келади?

8 ёш ва ундан катта бола учун ўйин анжомини қандай танлаш керак? Болажонлар ўйиннинг фантастик оламига шўнғишини қизиқарли жараёнга айлантириш учун қайси танловда тўхташ керак? Анжомлар бир хил мақсадда ишлаб чиқилган бўлса-да, уларнинг барчаси турли эҳтиёжларга хизмат қилади. Ҳар томонлама маъқул келадиган ўйин анжомини сотиб олиш учун, аввало унинг олдида турган асосий вазифаларни ўзингиз учун аниқлаб олишингиз керак.

Таъкидлаш жоизки, замонавий ўйин консоллари уйдаги телевизорда ўйнаш учун мосланган стационар ёки ўзи учун олиб юриш қулай бўлган портатив кўринишда бўлади. Иккала вариант ҳам болалар ва ўсмирлар учун мос келадиган ассортиментни ўз ичига олади, шу сабабли оила бюджетидан келиб чиққан ҳолда, шунингдек уйда анжом учун жой ҳамда уни улашнинг имкони мавжудлигини ҳисобга олиш мақсадга мувофиқ.

Хўш, оила бюджетига зиён келтирмаслиги, узоқ вақт хизмат қилиши ва фарзандингизга нафақат қувонч, балки фойда ҳам келтириши учун қайси консолни сотиб олиш керак? Ушбу мақолада ўйин анжомлари қандай бўлиши ва уларни танлашда нималарга эътибор қаратиш лозимлиги ҳақида сўз юритамиз.

Стационар ёки портатив консоллар – фарзандингиз учун қандай ўйин анжоми мос келади?

Агар сиз анъанавий классикани излаётган бўлсангиз, унда PlayStation линейкаси консолларини кўриб чиқишингиз мумкин. Уларда болаларда мантиқни ривожлантириш ва дунёқарашни кенгайтиришга ёрдам берадиган коўплаб қизиқарли ўйинлар мавжуд. Ўйинларнинг аксариятини икки кишилаб ўйнаш имкони мавжуд, шу сабаб бола ўз ака-ука, опа-сингил ёки дўстлари билан ўйнаши мумкин. Xbox ва Nintendo консоллари яхши аналоглар ҳисобланади – уларда барча ёшдаги болаларга мос келадиган ўйинларининг кенг танлови мавжуд.

Стационар консолларнинг портативларидан устунлиги – бу тасвирни юқори сифатда узата олишидир. Модел қанчалик янги бўлса, графика шунчалик яхши акс этади.

Эркатойингиз билан узоқ сафар ва саёҳатларга отланаётган бўлсангиз, сизга портатив консол асқотади. Бундай қурилмалар енгил ва ихчам, батарейка ёки аккумуляторда ишлайди. Бола сафарни енгил ва муаммосиз ўтказади, навбатда турганда инжиқлик қилмайди. Ўйин консолининг ўлчами уни исталган жойда ўзингиз билан олиб юриш имконини беради – гаджетни осонгина сумкангиз ёки чўнтагингизга жойлашингиз мумкин. Портатив ўйин ускуналари учун кўплаб хилма-хил аксессуарлар ишлаб чиқарилган. Аммо биринчи навбатда, гаджет ўз кўринишини сақлаб туриши ва сизга узоқроқ хизмат қилиши учун сиз корпус ва ҳимоя плёнкаси сотиб олишингиз зарур.

Фарзандингиз учун энг яхши ўйин анжомлари

Товарни танлашда уни ишлаб чиқарувчи компанияга эътибор бериш лозим. Ҳар бир ишлаб чиқарувчининг алоҳида устунлик ва ўзига хос жиҳатлари бўлади, бу эса у ёки бу консолни танлашингизда ҳал қилувчи омил вазифасини ўтайди.

Шубҳасиз, ҳозирги кунда энг машҳур консол – PlayStation 5. Мазкур ўйин ускунаси ўзининг сифатли графикаси, юқори самарадорлиги ва кўплаб қизиқарли ўйинлари билан мақтана олади. Бу ажойиб вариант – нафақат фарзандингиз, балки сиз учун ҳам қувончли харид бўлади. Консолнинг бу версияси аввалги версиялари атиги бир нечта жиҳати билан устун, шу туфайли юқорида қайд этиб ўтилган моделлар ҳам табиийки, фарзандингизга хуш келади.

Агар Microsoft дан ўйин анжомини танлаш керак бўлса, у ҳолда – энг сўнгги версиялар ҳисобланмиш Xbox Series X ва Xbox Series S исталган турдаги кўплаб қизиқарли ўйинларни ўз ичига қамраб олишга улгурди. Унинг ўтмишдоши, болалар учун саргузашт ўйинларнинг улкан кутубхонаси бўлмиш Xbox One бирмунча ҳамёнбоп танлов. Нафақат янгилик ихлосмандлари, балки классикани севувчиларнинг ҳам қизиқишлари ҳисобга олган ушбу серия анжомлари тескари мувофиқликка эга – эски авлод сериялари учун ишлаб чиқилган ўйинларни ҳам қўллаб-қувватлайди.

Портатив консоллар орасидан Nintendo Switch ни алоҳида ажратиб кўрсатиш мумкин. Мўжаз портатив ўйин ускунаси илк маротаба 2017-йилда чиқарилган ҳамда энг яхши техника янгилиги рейтингида еткачи ўринлардан бирини эгаллаб, улкан муваффақиятга эришган. Консол фарзандингизни кўзни қувонтирувчи дизайни, ёрқин ранглари ҳамда рангларнинг ўзаро мувофиқ комбинацияси билан хурсанд қилади. Ўйин ускунасининг қуввати портатив режимда бир неча соат фаол ўйин ўйнаш учун етади. Ўйин ишқибозларининг айнан Nintendo Switch ни харид қилишларига жиддий сабаб – бу фақат шу қурилмада ўйнаш мумкин бўлган махсус ўйинлардир. Омма орасида машҳур бўлган кўплаб ўйин серияларини фақат унда ўйнаш мумкин. Аёнки, Nintendo Switch – болалар учун аъло даражадаги ўйин анжомларидир.

Арзонроқми ёки қимматроқ, масала шунда

Сўнгги йилларда коўплаб қизиқарли ўйин консоллари ишлаб чиқарилди. Танлов жуда кенг, ҳар қандай дидга мос келувчи, турли ранг, нарх ва тўпламдаги ўйин анжомларини топиш мумкин. Бироқ, янги моделларнинг нархи анча юқори, шу сабаб бу янгиларини харид қилиш оила бюджетига оғирлик қилиши мумкин.

Таъкидлаш лозимки, охирги йилларда ўйин саноатида айтарли жиддий ўзгариш юз бермади. Бу соҳада ишлаб чиқарувчилар ўша-ўша, PlayStation ва Xbox нинг сўнгги моделлари – эски версияларининг бироз такомиллаштирилган, бироқ асосий параметрлари ўзгаришсиз қолдирилган янгича кўриниши холос. Авлодлар ўртасидаги фарқ фақатгина графика сифати ва махсус ўйинлар билан чекланади.

Агар консол сотиб олиш учун маблағингиз чекланган бўлса, унда харидни Nintendo Switch нинг портатив ёки аввалги версияларнинг статсионар моделларидан бошлашингиз тавсия этилади. Улар бирмунча арзон, шу билан бирга кўпгина қизиқарли ва хилма-хил ўйинларни ўз ичига олади.